Ágætu félagar í Félagi markþjálfunar á Íslandi
Nú fer vetrarstarfið að hefjast eftir langt og gott sumar.
Ýmsar nýjungar eru á döfinni í félagsstarfinu sem vonandi verða til hagsbóta fyrir félaga í FMÍ.
Þeirra getið í fréttapóstum eftir því sem tilefni gefst til. Fyrsta nýjungin er samstarf FMÍ og Dokkunnar.
Í ágúst gekk FMÍ til liðs við Dokkuna, en Dokkan er nýtt „faglegt þekkingar og tengslanet sérfræðinga og fagfólks,
sem vill miðla sín á milli þekkingu, lausnum og reynslu og um leið stuðla að miðlun milli fyrirtækja og stofnana.“
Sjá nánar á: www.dokkan.is
Þetta þýðir að Dokkan mun sjá um alla fræðslufundi FMÍ og Anna María Þorvaldsdóttir,
sem ykkur er að góðu kunn, hefur verið ráðinn verkefnisstjóri í þekkingarhópi um markþjálfun.
Fræðsludagskráin fram að jólum hefur verið ákveðin og lítur svona út:
8. september: Árangur markvissrar markþjálfunar.
13. október: Sérhæfing markþjálfa.
10. nóvember: Siðreglur og grunnhæfnisþættir markþjálfa.
8. desember: Jólaglögg markþjálfa.
Þessir fundir standa öllum skuldlausum félögum til boða og væntum við góðs af samstarfi við Dokkuna.
Fyrsti júní s.l. var gjalddagi félagsgjalds í FMÍ sem er aðeins 5.000,- kr. og hefur ekki hækkað undanfarin þrjú ár.
Ég vil nota þetta tækifæri og hvetja alla sem ekki hafa enn gengið frá greiðslu félagsgjalda
að gera það sem allra fyrst og taka þátt í starfinu til eflingar á félaginu og faginu.
Á síðasta starfsári voru haldnir sjö stjórnarfundir og auk þess einn hugflæðisfundur.
Félagið stóð fyrir þremur fræðslufundum, einum almennum félagsfundi og einnig aðventufagnaði.
Þá tók félagið þátt í Lausnum 2010, studdi við grasrótarstarfið sem stóð að Kærleiksviku í Mosfellsbæ,
og auk þess starfaði fjöldi félagsmanna á Þjóðfundinum ýmist sem lóðsar eða svæðisstjórar.
Allt starf stjórnarinnar er unnið í sjálfboðavinnu og við óskum eftir virkri þátttöku ykkar í félagsstarfinu,
einnig hvetjum við ykkur að hafa samband með hugmyndir, tillögur, athugasemdir og
raunar hvaðeina sem ykkur liggur á hjarta varðandi félagsstarfið og fagið.
