Samþykktir Félags markþjálfunar á Íslandi
(The Icelandic Coaching Association)

1. gr.

Heiti félagsins er Félags markþjálfunar á Íslandi (The Icelandic Coaching Association). Heimili þess og varnarþing er í Reykjavík.

2. gr.

Félag markþjálfunar á Íslandi er félag þeirra sem starfa að þjálfun á Íslandi eins og hún er skilgreind í 3. gr.
Markmið félagsins er að kynna starfsemi markmiðaþjálfunar á Íslandi, fræðilegan grunn greinarinnar og siðareglur. Félagið mun annast fræðslustarfsemi og standa vörð um heilindi greinarinnar.
Félagið leitast við að samræma skilgreiningu á markmiðaþjálfun (ensk. Coaching) á Íslandi.
Félagið mun leitast við að vera í samstarfi við önnur félög sem starfa á svipuðum grunni á landsgrunni eða fjölþjóðlegum.
Félag markþjálfunar á Íslandi tekur hvorki afstöðu til trúmála né stjórnmála.

3. gr.

Félag markþjálfunar á Íslandi er félag þeirra sem starfa við markþjálfun á Íslandi.  Þ.m.t. stjórnendaþjálfun og lífsþjálfun.

Félagar geta þeir orðið sem hafa lokið menntun og þjálfun á þessu sviði, sem viðurkennd er af alþjóðlegum eða evrópskum samtökum á þessu sviði. Einnig geta þeir orðið félagar sem hyggjast leggja stund á nám og þjálfun á þessu sviði.

4. gr.

Stjórn félagsins skal skipuð formanni og fjórum mönnum auk tveggja varamanna, sem kosnir eru á aðalfundi. Hlutkesti skal ráða ef atkvæði eru jöfn. Stjórnin er kosin til tveggja ára í senn, þó þannig að árlega ganga úr henni tveir stjórnarmenn. Formaður og varamenn auk tveggja skoðunarmanna eru kosnir til eins árs í senn.  Stjórnin skiptir að öðru leyti með sér verkum, á fyrsta fundi sínum, og kýs sér varaformann, ritara og gjaldkera.
Starfsár stjórnar er milli aðalfunda og tekur ný stjórn við starfi eftir aðalfund.  Fráfarandi stjórn gengur frá ársreikningi félagsins og leggur fyrir aðalfund.
Sami félagsmaður skal eigi sitja lengur en fjögur ár samfellt í stjórn félagsins.
Miða skal við að stjórnarmenn félagsins hafi til staðar eða stefni á, innan árs, alþjóðlega  vottun frá International Coach Federation eða sambærilegum alþjóðlegum félögum.

5. gr.

Stjórnin ber ábyrgð á daglegum rekstri og stjórnun félagsins, þ.m.t. fjármálum. Stjórn starfar samkvæmt umboði félagsmanna milli aðalfunda.

6. gr.
Aðalfund skal halda ár hvert ekki síðar en í febrúar mánuði.   Til fundar skal boðað rafrænt með tölvupósti, eða bréfapósti, sendum á félaga samkvæmt félagaskrá,  með a.m.k. fjórtán daga fyrirvara.  Reikningar félagsins skulu þá liggja fyrir.  Aðalfundur er lögmætur ef löglega er til hans boðað.

Dagskrá aðalfundar:
• Kosning fundarstjóra
• Kosning ritara aðalfundar
• Skýrsla stjórnar
• Reikningar síðasta árs skulu lagðir fram til samþykktar
• Kosning formanns félagsins
• Kosning stjórnarmanna og varamanna í stjórn félagsins
• Kosning skoðunarmanna
• Stjórn leggi fram starfs og fjárhagsáætlun ársins
• Önnur mál

Starfsár stjórnar félagsins er milli aðalfunda og reikningsár er almanaksárið.
Hver félagi í Félagi markþjálfunar á Íslandi hefur eitt atkvæði við atkvæðagreiðslu í félaginu.
Félagsmaður ber ábyrgð á réttri skráningu sinni í félagaskrá.

7. gr.

Félagsmenn skulu greiða árgjald til félagsins sem aðalfundur ákveður fyrir eitt ár í senn. Stjórn félagsins getur tekið af félagaskrá þá sem skulda árgjald fyrir eitt ár enda hafi þeir áður verið skriflega krafðir um greiðslu og þeim kynntar þessar afleiðingar vanskilanna.

8. gr.

Formaður boðar stjórnarfundi eftir því sem þurfa þykir, en skylt er að boða til stjórnar-funda innan tveggja vikna þegar einhver stjórnarmanna krefst þess. Stjórnarfundir eru því aðeins lögmætir að þrír stjórnarmenn hið fæsta, eða varamenn í forföllum þeirra, sæki fundi.
Firmaritun félagsins er í höndum meirihluta stjórnar.

9. gr.

Breytingar á lögum félagsins má aðeins  gera á aðalfundi. Breytingartillögur skal kynna í fundarboði og teljast þær því aðeins samþykktar að eigi minna en 2/3 fundarmanna greiði þeim atkvæði.

10. gr.

Um slit félagsins gildir það sama og um lagabreytingar. Fundur sá sem samþykkir á lögmætan hátt að slíta félaginu kveður á um hvernig ráðstafa skuli eignum þess til góðgerðamála.
Þó skal sýslumanni falið að geyma eignir félagsins í tvö ár áður en þeim er ráðstafað.

11. gr.

Þannig samþykkt á stofn félagsfundi þann 12. desember 2006.